బెండకాయ/వంకాయ గొజ్జు

బెండకాయ/వంకాయ గొజ్జు

దీనికి తిరగవాత పెట్టటానికి మాత్రమే స్టవ్ అవసరం. అంటే దీన్ని తూర్పునాటోళ్ళు (అంటే కోస్తా వాళ్ళు అన్నమాట)
పచ్చిపులుసు అంటారనుకుంటా. ఇక ఈ వంటకం మేమెలా చేస్తామో చెపుతాను.
ఇది ముఖ్య ఆధరువు కాదు. చప్పని పప్పుకి గానీ, దద్ధోజనానికి గానీ, వఠ్ఠి పెరుగన్నానికి గానీ జోడీ గా బాగుంటుంది.
చప్పని పప్పు అంటే ఏమిటీ చెప్పని పప్పు అనేరు సుమా! గోంగూర పప్పు, మామిడికాయ పప్పు, టమేటొ పప్పు, ఆకుకూర పప్పు లాగా కూరలుగాని, కారం గానీ, చింతపండు గానీ లేకుండా కందిపప్పు మాత్రం ఉడికించి, ఉప్పు, పసుపు వేసి, అందులోకి చక్కగా కరివేపాకు, ఎండుమిర్చి, ఆవాలు, మినపగింజలతో పాటు ఇంగువ వేసి తిరగవాత బెట్టిన పప్పు అన్నమాట. ఇక ఈ బోనస్ వంటకం అయిపోయింది అసలు వంటకం లోకి వస్తామా?

కావలసిన పదార్థాలు: బెండకాయలు రెండు/ వంకాయ పెద్దది ఒకటి.
చింతపండు ఒక పెద్ద ఉసిరికాయంత
బెల్లము రుచిని బట్టి ( చింతపండు కన్నా ఎక్కువే పడుతుంది.)
ఉప్పు తగినంత
నువ్వులు ఓ రెండు పిడికిళ్ళు ( లేదా ఒక పిడికిలి నువ్వులు, మరో పిడికిలి బుడ్డపప్పులు వేసుకోవచ్చు)
పసుపు చిటికెడు
పచ్చిమిర్చి మూడు
ధనియాలు అర చెంచా
తిరగవాతకు:
నూనె రెండు చెంచాలు
జిలకర అర చెంచా
కరివేపాకు రెండు మూడాకులు

చేసే విధానం :
ముందుగా చింతపండు ఒక ఇరవై నిముషాలు నానబెట్టి రసం తీసి, ఒక పెద్ద లోటా నీళ్ళు కలపాలి. ఇందులోఉప్పు, మెత్తగా దంచిన బెల్లం వేసి కరగనివ్వాలి. ఈలోపు పచ్చినువ్వుల్ని ( వేయాలనుకుంటే బుడ్డపప్పుల్ని) పొడి చేసి, ఆపైన పచ్చి మిరపకాయల్ని, ధనియాల్ని కలిపి మిక్సీలో వేసి ఈ మిశ్రమాన్ని చింతపండు రసంలో కలపాలి. బెండకాయలు వేయాలంటే రెండు అంగుళాల ముక్కలుగా తరిగి, నూనెలో వేయించి గొజ్జులో కలపాలి. వంకాయలు వేయాలంటే, కాల్చి, తొక్క తీసి మెత్తగ పిసికి కలపాలి. ఆపైన తిరగవాత పెట్టుకోవాలి. ఓ అరగంట ముందే తయారుచేసిపెట్టుకుంటే భోజనాల వేళకి బాగుంటుంది.

గమనిక :
* బెండకాయలు గాని, వంకాయలు గాని వేయాలి. రెండూ వేయకూడదు.
* నువ్వులు తెల్లవైనా, నల్లవైనా మీ మీ ఇష్టం.
* విందులప్పుడు ఒక ఆధరవు, సులభంగా తయారయ్యేది.