Loading...

2, డిసెంబర్ 2016, శుక్రవారం

బాదం కోవా

నేను చేసిన బాదం కోవా :)
          పాలతో కోవా చేయడం అందరికీ తెలిసినదే. చాలా సులభం. కాకపోతే ఓపిక కావాలి. ఇప్పుడు బాదం పొడితో
కూడా కలిపి బాదం కోవా చేస్తే తినడానికి చాలా బాగుంటుంది.

తయారు చేయడానికి కావలసినవి:-
అడుగు మందం ఉన్న వెడల్పు గిన్నె లేదా బాణలి (చాలా ముఖ్యం. పలుచగా ఉంటే మాడి పోగలదు.)
పాలు మనక్కావలసినన్ని తీసుకోవచ్చు. అరలీటరు పాలకు మూడు నాలుగు  కోవా బిళ్ళలు రాగలవు అని గుర్తుంచుకొని తీసుకోవాలి.
చక్కెర అరలీటరు పాలకు రెండు పిడికిళ్ళు ప్రకారం తీసుకుంటే మరీ తీపి లేకుండా సరిగ్గా వస్తుంది. లేదంటారా మన రుచి ప్రకారం.
బాదం పొడి ఇది కూడా కావలసినంత. ఒక పిడికెడు నుంచి చూసి వేసుకోవచ్చు. (అంగళ్ళలో దొరుకుతున్నది. నేను ఎమ్ టీ ఆర్ బాదం పొడి వాడినాను.)
రెండు చెంచాల నెయ్యి.

తయారుచేసే విధానం:-
ముందుగా అడుగు మందం ఉన్న పాత్ర/బాణలిలో పాలన్నీ వేసి కాచాల.
పొంగు వచ్చాక మంట తగ్గించి అప్పుడప్పుడు చూసి కలుపుతూ ఉండాల.
పాలు నెమ్మదిగా కాగుతూ, మరుగుతూ ఉంటాయి. పొంగకుండా చూసుకోవాల .
సుమారు గంట ఉంచాక కొంచెం దగ్గర పడుతుండగా కొద్దికొద్దిగా బాదం పొడి చల్లుతూ కలుపుకోవాల.
బాగా కలిసిపోతుంది. ఏమీ ఉంటలు కట్టదు.
తరువాత చక్కెర వేసి కలుపుతూ మాడకుండా చూసుకోవాల.
మధ్యలో రెండు చెంచాల నెయ్యి కూడా వేసుకోవాల.
బాగా రవ్వరవ్వగా ముద్దముద్దగా కంటికి కనపడుతుంటే దించుకోవడమే.

29, ఏప్రిల్ 2016, శుక్రవారం

మామిడికాయ చారు

అతి సర్వత్ర వర్జయేత్ - ఏదైనా మితంగానే ఆహారం తీసుకోవాలి. ఈ కాలంలో మామిడి ఎక్కువ దొరుకుతుంది. ఈ యేడు కొంచెం తక్కువగానే కన్పిస్తున్నాయనుకోండి.
మామిడి కాయలు, మామిడి పండ్లు చాలా ఇష్టంగా తింటాం.
మామిడి కాయతో పప్పు, రోటి పచ్చళ్ళు, నిలువ పచ్చళ్ళు, ఊరగాయలు మామూలే.
 మామిడి పండ్లు ఎక్కువ తింటే వేడి చేస్తుందంటారు గానీ, మామిడికాయ చలువ చేస్తుంది.

మామిడికాయ చారు లేదా రసం సులభంగా చేసుకోవచ్చు. రుచిగా ఉంటుంది. ఎండలలో మనకు మంచిది కూడా.
 కావలసిన వస్తువులు--
మామిడికాయ
బెల్లం (కాయ ఎంతుందో అంత)
ఉప్పు కొద్దిగా
కారప్పొడి కొద్దిగా

చేసే పద్ధతి--
పొయ్యి మీద నీళ్ళు పెట్టి మరుగుతుండగా మామిడికాయ వేసుకొని ఉడికించుకోవాల.
(ఉడికిందంటే కాయ రంగు తగ్గుతుంది, నీళ్ళు సగమౌతాయి)
ఆ నీటిలో ఉప్పు కారం కూడా వేసి రెండు నిముషాలయినాక పొయ్యి మీద నుంచి దించుకోవాల.
 చల్లబడినాక అదే నీటిలో మామిడి కాయ చేత్తో చక్కగా పిసికి , తొక్క పడేయాల.
తగినన్ని నీళ్ళు కలుపుకొని చల్లపెట్టెలో కాసేపుంచుకొని చల్లగా తాగొచ్చు.

౧. వడగట్టేయవద్దు. మామిడికాయ గుజ్జు మధ్యలో వస్తున్నా, తాగేయవచ్చు. బాగుంటుంది.
౨. పెద్ద మామిడికాయ అయితే ఒక కాయకు రెండు లోటాలు వస్తాయి.
౩. ఇష్టాన్ని బట్టి మామూలు చారు లా గా అన్నంలోనూ కలుపుకోవచ్చు.

6, జూన్ 2015, శనివారం

వంకాయ చెట్నీ (సులభంగా)

వంకాయతో పాటు మామూలుగా ఇంకాకొన్ని వేసి చెట్నీ అందరం చేస్తాం. ఉల్లిగడ్డలు, టమేటోలు, చింతపండు ఇలా...
ఇది కావాలంటే ఇక్కడ. http://seemavanta.blogspot.in/2010/05/blog-post.html
అవేమీ లేకుండా అద్భుతమైన రుచితో మరొక్కసారి కలుపుకొనే చెట్నీ అందరికీ నచ్చేది ఈ సులభతరమైన వంకాయ చెట్నీ.
కావలసిన పదార్థాలు-- లేత వంకాయలు
                                పచ్చిమిరపకాయలు తగినన్ని
             (వంకాయ సైజును బట్టి, మిరపకాయ కారాన్ని బట్టి, మన రుచిని బట్టి వేసుకోవాలని అర్థం. ఉదాః కు నాలుగు వంకాయలకు ఐదారు పచ్చిమిరపకాయలు.)
                              ఉప్పు.
                        తిరగవాత(తాలింపు) కు నూనె, మినప్పప్పు, ఎండుమిర్చి, కరివేపాకు, ఇంగువ (అన్నీకలిపి ఒక చెంచాలో వస్తే చాలు.)
అంతే. ఇంకేమీ లేదు.

చేసే విధానం---
ముందుగా వంకాయల్ని , పచ్చిమిరపకాయల్ని ఒకే ఒక్క చెంచా నూనె వేసి వేయించాలి.
ఇంక వంకాయలు, పచ్చిమిరపకాయలు, ఉప్పు వేసి మిక్సీలో మరీ మెత్తగా కాకుండా తిప్పాలి.
ఇంగువ తిరగవాత పెట్టాల అంతే.
ఎంత బాగుంటుందో! తలచుకుంటే నోరూరిపోతుంది.

23, సెప్టెంబర్ 2014, మంగళవారం

బుడ్డలపాకం

బుడ్డలు, చనక్కాయలు, వేరుశనక్కాయలు, పల్లీలు అన్నింటికీ అర్థం ఒకటే.
బుడ్డలు వలిచి విత్తనాలు తీస్కోవాల.
ఎన్ని అనేదేముంది? ముందుగా ప్రయత్నం చేస్కొనేటపుడు ఎవరైనా ఒక లోటాడు, లేదా ఒక్క చిన్న గిన్నెడు తీసుకుంటే మేలు. బాగా వచ్చిందంటే కొలతలు పెంచుకోవచ్చు.
ఏ కొలత లో బుడ్డల విత్తనాలు తీస్కున్నామో అదే గిన్నెడు బెల్లం మెత్తగా దంచినది తీసుకోండి.

కావలసిన పదార్థాలివే.
బుడ్డల విత్తనాలు, దంచిన బెల్లం, ఒక్క చెంచాడు నెయ్యి, కొంచెం నీళ్ళు అంతే.

చేసే విధానం
ముందుగా బుడ్డల విత్తనాలు ఉత్త బాణట్లో వేయించుకోవాల. ఏ జిడ్డూ అవసరం లేదు.
అయితే మాడకుండా చూసుకుంటూ వేయించుకోవాల. వాటిపైన పొట్టు కొంచెం కొంచెం నల్ల బడుతుంది కాదనను. కానీ మాడకూడదు. వేగిన బుడ్డల రుచి తెలిసిందే కదా! వేయించి అలవాటు లేదంటే మంచి వాసన వస్తుంది. గమనించండి. లేదా ఒకటిరెండు విత్తనాలు తీసి ఊది నోట్లో వేసుకొని తెలుసుకోండి.

తరువాత విత్తనాలు కొంచెం చల్లగయ్యే వరకూ ఉండి ఆ విత్తనాలను ఒక చాటలో పోసుకొని చపాతీ లట్టణికె (చపాతీ చేసే కట్టె/ అప్పడాల కర్ర) ను తీసుకొని బుడ్డల విత్తనాల మీదుగా కొంచెం వత్తిడి పెంచుతూ ఆడిస్తే పొట్టు అంతా వచ్చేస్తుంది. ఆ పొట్టు చెరిగేయండి పోతుంది. విత్తనాలు కూడా విడిపోతాయి రెండు ముక్కలుగా.

ఇప్పుడు దంచిన బెల్లంలో కొంచెం తడిసే వరకూ నీళ్ళు పోసి అంటే కొంచెమే చేతిలో పోసుకొని చేతితో కలిపితే చాలు.
పొయ్యిమీద పెట్టండి.

కలుపుతూ ఉండండి.వెంటనే బెల్లం కరిగి పాకం తయారవుతుంది. మరగడం మొదలుపెడుతూనే బుడ్డల విత్తనాలు వేసేసి కలపండి.
తొందరగా దగ్గరికి వచ్చేస్తుంది.
ప్రక్కనే ఒక చెంచాడు నెయ్యి ముందే పూసి సిద్ధం చేసుకున్న తట్టలోకి వంపేయండి.
ఐదు నిముషాలుండి ముక్కలు గా తీసుకునేటట్టు చాకుతోనో సలాకితోనో గీసుకొని ఉంచుకోండి.

ఇంకో ఐదు నిముషాలుంటే బాగా గట్టిగా అయిపోతుంది.
అప్పుడు చేతితో ముక్కలు చేసుకుంటే సరిపోతుంది.


నీళ్ళు మాత్రం బెల్లంలో ఎక్కువపడకూడదు అంతే. సులభంగా చేస్కోవచ్చు.

మనకందరికీ తెలిసినట్టు బుడ్డల విత్తనాలు, బెల్లం రెండూ ఆరోగ్యానికెంతో మంచివి.
ఇంక జిడ్డేమీ లేదు- నెయ్యి, నూనె మాదిరి. కాబట్టి ఇంతకంటే రుచిగా, ఆరోగ్యమిచ్చేదిగా ఏ తీపుంటుంది?
కాలక్షేపానికి , సాయంకాలం పూట తినడానికి , ప్రయాణాల్లో తీస్కొనిపోడానికి మంచి చిరుతిండి ఇది.

2, మే 2014, శుక్రవారం

పత్రికలో నా వంటా వార్పూ బ్లాగు

ఈ నెల తెలుగువెలుగు పత్రికలో ముప్ఫయ్యైరెండవ పేజీలో నా యొక్క "మా వంటా వార్పూ" బ్లాగు గురించి వ్యాసకర్త మధురవాణి గారు వ్రాయగా; పత్రిక వారూ కొన్ని ప్రశ్నలు  అడిగి నా సమాధానం తోపాటు ప్రచురింపబడటం సంతోషం కలిగించింది.
ఈ సందర్భంగా మధురవాణి గారికి, పత్రిక వారికి బ్లాగ్ముఖంగా ధన్యవాదాలు.

3, మార్చి 2014, సోమవారం

మెంతికూర పొడికూర

ఆకుకూరల్లో మెంతికూర ఎంత మంచిదో అందరికీ తెలిసిన సంగతే. స్త్రీలకు, మధుమేహరోగులకు మరీ మంచిది.
ఈ మెంతికూర  సరిగ్గా చేస్తే ఎంతో రుచికరంగా ఉంటుంది. ఎవ్వరూ వద్దనరు. ఇంక వంకాయతో కలిపి పప్పులో వేస్తే ఆ రుచే వేరు. అద్భుతంగా ఉంటుంది. ఈ బ్లాగులోనే వంకాయమెంతికూర పప్పుకు వచ్చినన్ని హిట్లు మరి దేనికీ రాలేదు.
ఇప్పుడు మెంతి కూరను కూరగా ఎట్ల చేయాలో చూద్దాం

కావలసిన పదార్థాలుః-
  1. పెద్ద మెంతికూర కట్ట - ఆకులు దూసి కడిగి తరిగి పెట్టుకోవాల.
  2. కందిపప్పు           - ఒక పిడికెడు
  3.  ఉప్పు               -తగినంత
  4.  కారప్పొడి          -తగినంత (బాగానే పడుతుంది)
  5.  పసుపు            -చిటికెడు
  6.  నూనె              -అర్ధ గరిటెడు
  7.  ఎండు కొబ్బెర పొడి (పచ్చి కొబ్బెర బాగా ఎండినది ఇంట్లో ఉన్నా వాడుకోవచ్చు.)
  8. తిరగవాతకు ఆవాలు, ఎండుమిరపకాయలు, మినపబేడలు, శెనగబేడలు , ఇంగువ
          
చేసేవిధానం:-
  • ముందుగా  కందిబేడలను ఉడికించి పెట్టుకోవాల. 
  • బాణట్లో నూనె వేసి తిరగవాత వేసి వేగనిచ్చి తరిగిన మెంతికూర వేసి సిమ్ చేసి మూతపెట్టాల. 
  • మెంతికూర మగ్గేలోపు ఉడికి చల్లగైన కందిబేడలను నీరు లేకుండా గట్టిగా పిండేసి పెట్టుకోవాల.
  • ఐదు నిముషాలలోపే మెంతి కూర మగ్గి ఉంటుంది. దాంట్లో గట్టిగా పిండి పెట్టుకున్న కందిబేడలను వేసి కలిపి కారంపొడి వేసి మూతపెట్టి ఉంచాల.
  • ఐదు నిముషాలయినాక దాంట్లో ఉప్పు , కొబ్బెరపొడి వేసి బాగా కలిపి కొంచెంసేపు మూత పెట్టి ఉంచాల.
  • బాగా బాగా పొడిపొడిగా కూర వచ్చినాక దింపేయాల.
  • ఈ కూర అన్నంలో కలుపుకుంటే ఎంతో రుచిగా ఉంటుంది.

17, డిసెంబర్ 2013, మంగళవారం

పెసర ఉంటలు

ఉన్నట్టుండి తీపి తినాలనిపించినా కూడా టక్కున చేసేసుకొనే తీపి వంటలు మనకెన్నో ఉన్నాయి. వాటిల్లో ఒకటి ఈ పెసర ఉంటలు. అంటే పెసరబేడలతో లడ్లన్నమాట.నిముషాల్లో అయిపోయేదీ, నిలవ ఉండటంలో వెనకాడనిదీ ఈ తీపి వంటకం. పది పదిహైదు రోజులున్నా తాజాగా ఉంటుంది. పది పదహైదుగురు పిల్లలున్నచోట అయితే ఫట్ మని అయిపోయేదీ ఈ తీపి వంటకం.

కావలసిన పదార్థాలు:-
పెసరబేడలు (ఎన్నో)
చక్కెర (అంతే )
అంటే సమానంగా అనమాట.
జీడిపప్పు
ఏలకుల పొడి
నెయ్యి పట్టినంత

తయారు చేసే విధానం :-
ముందుగా పెసరబేడలను కమ్మని వాసన వచ్చేదాకా వేయించుకోవాల. రంగు మారుతూ ఉండగానే కమ్మని వాసన వస్తుంది. సన్నని మంట మీద ఓపిక గా వేయించుకుంటే ఎఱ్ఱబడకుండా, మాడకుండా దించేయవచ్చు.
కొద్దిగా నెయ్యి వేసి జీడిపప్పు వేయించుకోవాల.
వేయించిన పెసరబేడలను, చక్కెర ను, జీడిపప్పు ను, ఏలకుల పొడిని కలిపి విసరుకోవాల. అదే మిక్సీలో తిప్పుకోవాల.
పూర్తి మెత్తగా వేస్తే అంగిటికి అతుక్కుంటుంది. మరీ నూక గా కూడా వేయకూడదు. చూసి పొడి చేసుకోవాల.
ఈ మిశ్రమాన్ని గిన్నెలో కి తీసుకొని కరిగించిన నెయ్యి పోస్తూ ఉండలు కట్టుకోవాల.
ఉండకట్టడానికి కావలసినంత నెయ్యి పోస్తే బాగుంటుంది. తక్కువైతే ఉండ విడిపోతుంది. ఎక్కువైతే మరీ బాగుండదు.
పైన కావాలంటే జీడిపప్పు పలుకులు అతికించుకోవచ్చు. అవి అడ్డంఅనుకుంటే మానేయవచ్చు.

17, ఆగస్టు 2012, శుక్రవారం

రవలడ్డు


కావలసిన వస్తువులు:
౧.బొంబాయిరవ  ఒక గిన్నె
౨.పచ్చికొబ్బెర     ఒక గిన్నె
౩.చక్కెర            రెండు గిన్నెలు
౪.నెయ్యి           సగం గిన్నె
౫.యాలక్కాయపొడి కొద్దిగా

చేయవలసిన పద్ధతి:

ముందుగా రవ, కొబ్బెర తురిమినది సమానంగా తీసుకొని చిన్న సెగ మీద నెయ్యి వేసి నిదానంగా వేయించాల. రెండూ కలిపే వేయించాల.
ఇంకా ఎక్కువ చెయ్యాలనుకున్నా కూడా రెండిటినీ కొద్దికొద్దిగా తీసుకొని కలిపి వేయించాల.  ఎఱ్ఱ బడకుండా వేయించుకొని పక్కకు పెట్టుకోవాల.
చక్కెరను కొంచెం నీళ్ళతో తడిపి పొయ్యి మీద పెట్టాల.
ఉండపాకం వస్తూనే రవ , కొబ్బెర మిశ్రమాన్ని మెల్లమెల్లగా పాకంలో వేస్తూ కలియబెట్టాల.
తొందరగానే కలిసిపోయి నీళ్ళశాతం ఆవిరయిపోతుంది.
యాలక్కాయపొడి వేసి బాగా కలిపి దించాలి.
వేడి మీద లడ్లు కట్టేయాలి.
కొంచెం గాలి తగులుతుండగానే పొడిపొడిగా అయిపోతుంది కాబట్టి ఉండలుగా రాదు. అట్ల రాకపోతే ఒక చుక్క పాలు వేసి కలిపి కట్టుకోవచ్చు. వేడి మీద కడితే పాల అవసరం ఉండదు.
గమనిక:
౧.చక్కెరలో నీళ్ళు కొంచెం ఎక్కువ ఐతే లడ్లు ముద్దముద్ద గా ఉంటాయి. తక్కువ అయితే మరీ పొడిపొడిగా అయి పాలు లేకపోతే కట్టడం కష్టం అయిపోతుంది. కాబట్టి నీళ్ళు చూసి సరిగ్గా వేసుకోవాలి.
౨.పాకంలో రవ, కొబ్బెర ఉడికి ఉండడం వలన కమ్మగా నోట్లో పెట్టుకోగానే కరిగిపోతూ రుచిగా ఉంటుంది.
౩.దీనికి గోడంబి అదే జీడిపప్పు నాకంతగా నచ్చదు. కావలిస్తే వేసుకోవచ్చు.

4, జూన్ 2012, సోమవారం

దోసకాయ పెరుగు పచ్చడి


మా సీమలో దోసకాయ అంటారు కానీ కొందరు కీర దోసకాయ అంటారనుకుంటా. అంటే చూడటానికి ఆకుపచ్చని గీతలో లేతాకుపచ్చ రంగులో బీరకాయకు తోబుట్టువు లాగా ఉంటుందే. ఆ దోసకాయన్నమాట.
దోసకాయ పెరుగు పచ్చడి చూడ్డానికి కూడా చాలా బాగుంటుంది. ఈ బ్లాగ్ టెంప్లేట్ మాదిరి తెలుపుమీద ఆకుపచ్చ డిజైన్.

కాయ లో సహజ సిద్ధంగా ఉన్న నీరు వల్ల ఎండాకాలంలో ఎంతో మంచిది. పచ్చికాయ ముక్కలు గా కోసుకుని తింటే చాలా బాగుంటుంది. కొందరు ఉప్పు, కారం కూడా అద్దుకొని తింటారు కానీ నాకయితే ఉత్తదే ఇష్టము.ఇంతకీ పెరుగు పచ్చడి ఎట్ల తయారు చేయాలో చూద్దాం.

కావలసిన పదార్థాలు:_
దోసకాయ = లేతగా ఉంటే బాగుంటుంది. కొంచెం ముదిరినా కూడా ఫర్వాలేదు. చక్కగా కడిగి తురిమి పెట్టుకోవాలి.
పచ్చిమిరపకాయలు = కారం తినేవాళ్ళను బట్టి, కాయల కారాన్ని బట్టి చూసి వేసుకోవాలి. పెసరబేడలంత చిన్నగా తరిగితే కారం తెలీదు.
ఉప్పు = తగినంత
కరివేపాకు, కొత్తిమీర = సువాసనకు.
ఒక చిటికెడు పసుపు.
తిరగవాతకు  ఒక చెంచా నెయ్యి, ఆవాలు, మినపబేడలు, ఎండుమిరపకాయలు, ఇంగువ.

చేసే పద్ధతి:_
పెరుగు ఒక గిన్నెలోకి తీసుకోవాలి.
అందులో తురిమిన దోసకాయ (పచ్చిదే) వేసి, తగినంత ఉప్పు, ఒక చిటికెడు పసుపు, పచ్చి కరివేపాకు, కొత్తిమీర తరిగి వేసుకోవాలి.
ఇప్పుడు నెయ్యి తో తిరగవాత పెట్టి పెరుగు పచ్చడిలో కలపాలి.
నెయ్యి, ఇంగువ వాసనతో ఘుమఘుమలాడుతున్న పచ్చడి తయారు.
గమనికలు:_
నెయ్యి తప్పనిసరి.
భోజనంలో ఒక అదనపు ఆధరువు గా, పలావ్, ఫ్రైడ్రైస్ లాంటి వాటికి కూడా పనికి వస్తుంది. చపాతీకి కూడా బాగుంటుంది.
వడ్డించడానికి కొంచెం ముందుగా చేసుకోవాలి. బాగా ముందే చేస్తే తాజాగా ఉండదు.

29, మార్చి 2012, గురువారం

జొన్నరొట్టె పై పద్యము

జొన్నలు పిండి చేయుదము, సోకుకిరీటము తీసి వంగ, నా
నున్నని మేను చీల్చెదము, నొవ్వక నాలుగు ముక్కలొప్పగన్
సన్నని యుల్లి, దంచిన మసాలలు కూర్చిక; జొన్నరొట్టెలో
వెన్నను పూసి తిందుమిక; వేడిన వారికి కొంత బెట్టుచున్.




వంగ ను + ఆ= వంకాయను 

ప్రముఖ పోస్ట్‌లు