వంకాయ నించుడుకాయ

వంకాయ నించుడుకాయ

గుత్తి వంకాయ ఒక్కొక్కరూ ఒక్కోలా వండుతారు.

మా ఇంట్లో చేసే పద్ధతి నేను రాస్తాను. (అబ్బే, మేమూ ఇలాగే చేస్తామే అంటారా, సరే కానీండి.)

కావలసిన పదార్థాలు:

లేత వంకాయలు ~~~ కిరీటం తీసేసి + లాగా చీల్చి పెట్టుకోవాలి. (పూర్తిగా విడిపోకుండా)

ఉల్లిగడ్డలు ~~~ పొట్టు తీసి పెద్దపెద్ద ముక్కలు చేసి పెట్టుకోవాలి.

పప్పులు అదే వేయించిన శనగపప్పు అంటారే అదన్నమాట

ఎండుకొబ్బెర ~~~ తురిమి ఉంచుకోవాలి

ఉప్పు , కారంపొడి, నూనె

వంకాయలు ఓ ఎనిమిది ఉంటే ఓ నాలుగు ఉల్లిగడ్డలు, ఓ చిన్ని గిన్నెడు పప్పులు, ఓ చిన్ని ఎండు కొబ్బరి చిప్ప, రెండు పెద్ద చెంచాల కారప్పొడి, అంతే ఉప్పు , రెండు పెద్ద గరిటెల నూనె పడుతుంది.

ఇదంతా నేను అందాజుగా చెప్పిన కొలతలు. కొంచెం పప్పులు, కొబ్బెర, ఉల్లిగడ్డలు ఎక్కువేసుకున్నా రుచి బాగుంటుంది. తక్కువేసినా పరవాలేదు.

ఇక చేసే పద్ధతి:

* ముందుగా పప్పులు, తురిమిన కొబ్బెర, ఉప్పు, కారం పొడి చేసుకోవాలి.

* ఆ పొడిలో ఉల్లిగడ్డ ముక్కలు వేసి మళ్ళీ మిక్సీలో వేయాలి.

* ఇప్పుడు ఉల్లిగడ్డముక్కలు, పొడి అంతా కలిసి తడిపొడి గా ఉంటుంది.

* అదంతా ఒక గిన్నెలోకి తీసుకుని, అందులో ఒక పెద్ద గరిటెడు నూనె పోసి, (ముద్దగా కాకూడదు కానీ మరీ పొడిగా కూడా ఉండకూడదు.) కలిపి పెట్టికోవాలి.

* ఇప్పుడు చీల్చి నీళ్ళల్లో వేసి పెట్టుకున్న వంకాయలను ఒక్కొక్కటిగా తీసుకుని, ఆ వంకాయ లోపల నూనె కలిపిన పొడిని కూరుకోవాలి.

* అన్ని వంకాయలూ అయిపోయాక పొడి మిగిలితే మంచిది. కూర పైన చల్లుకోవడానికి.

* ఇంక పొయ్యి మీద ఒక మందమైన బాణలి పెట్టాలి.

* బాణలి వేడెక్కక మునుపే పొడి కూరిన వంకాయలన్నీ వరసగా బాణట్లో పేర్చుకోవాలి.

* బాణలి మీద మూత పెట్టి, పొయ్యి వేడి తక్కువలో పెట్టాలి.

* మధ్యలో అప్పుడప్పుడూ జాగ్రత్తగా వంకాయల్ని(కాయ చిదమకుండా)

కదుపుతూ ఉండాలి. ( అలవాటైన వాళ్ళైతే మూత తీయకుండా పట్టకారుతో జాగ్రత్తగా బాణలినే కొంచెం కుదిపి పెట్టుకోవచ్చు. కాయ చిదమకుండా బాగుంటుంది.

* అవసరమనిపిస్తే కొంచెం నూనె వేసుకోవచ్చు.

* ఒక పది, పదిహైదు నిముషాల్లో వంకాయ ఉడికి ఉంటుంది.

* పైపైన ఆ మిగిలిన పొడి చల్లుకుంటే బాగుంటుంది.

* వెంటనే కదిలించకండి. కొంతసేపయినాక జాగ్రత్తగా కలిపి పెట్టుకోవాలి.

మంచి వాసనతో రుచికరమైన వంకాయ నించుడుకాయ తయారు.

గమనిక: * దీనిని అన్నంతోనూ, చపాతీ తోనూ, జొన్నరొట్టె తోనూ తినొచ్చు. జొన్న రొట్టె తో అయితే స్వ ర్గమే కనిపించేస్తుందనుకోండి. నాదీ హామీ.