సండిగి గొజ్జు

సండిగి గొజ్జు

ఇది పులుసు మాదిరి ఉంటుంది. గొజ్జు అనేది కన్నడ ప్రభావం నుంచి వచ్చిన మాట. సండిగి అంటే కన్నడలో వడియాలని అర్థం. కానీ ఈ వంటకీ వడియాలకీ ఏ సంబంధం లేదు. మరి ఈ పేరు ఎందుకు పెట్టారో తెలీదు. కానీ పేరు బాగుందని ఇలాగే పరిచయం చేస్తున్నాను.
ఈ పులుసులో కందిపప్పు బాల్స్ తేలుతూ చూడడానికి చాలా గమ్మత్తుగా ఉంటాయి. అన్నంలో కలుపుకొని తినేప్పుడు అవి చిదుముకొని కలుపుకుంటే ఆహా.. ఏమి రుచి అనాల్సిందే.

కావలసిన పదార్థాలు:

కందిపప్పు (ఓ పిడికెడు తీసుకుని చూడండి ముందు)
ఎండుకొబ్బరి ఓ రెండు చెంచాలు *
పచ్చిమిర్చి ఓ రెండు * అన్నీ ఉజ్జాయింపుగా చెప్పాను సుమా!
జీలకర్ర ఓ చెంచా *
ఉప్పు తగినంత *
కారప్పొడి తగినంత
చింతపండు గంగరేగు పండంత *
పోపు దినుసులు
నూనె ఓ రెండు చెంచాలు
అంతే!

చేసే పద్ధతి:

ముందుగా కందిపప్పును బరకబరకగా మిక్సీలో వేసుకోవాలి.
తరువాత విడిగా
ఎండుకొబ్బరి, పచ్చిమిర్చి, జీలకర్ర, ఉప్పు మెత్తగా నూరుకోవాలి.
ఈ మిశ్రమాన్ని, కందిపప్పు పొడిని తగుమాత్రం నీరు వేస్తూ ఉండలు (బాల్స్) కట్టాలి.
గిన్నెలో పోపు (అనగా నూనె కాగాక ఆవాలు, మినప్పప్పు, ఎండుమిర్చి,కరివేపాకు, పసుపు )
వేసి తగినన్ని నీళ్ళు పోసి (ఓ పెద్ద గ్లాసుడు) మరగనివ్వాలి.
నీళ్ళలో ఒక్కొక్క ఉండ నెమ్మదిగా వదలాలి.
ఉండలు ఉడికాక చింత పులుసు పిండాలి.
ఉప్పు, కారప్పొడి వేయాలి.
పైన ఇంగువ పోపు పెడితే బావుంటుంది.

* ఉండలు ఉడికాయో లేదో తెలుసుకోవాలంటే ఒక చెంచాతో ఒక ఉండ పైకి తీసుకుని తాకి చూడాలి ఉడికితే చేతికి అంటుకోదు.
* చింత పులుసులో కందిపప్పు పొడి ఉండలు కట్టగా మిగిలింది కలిపి వేస్తే చక్కగా ఉంటుంది. అది లేకపోతే కాస్త బియ్యప్పిండి కలిపి వేస్తే సరి.(ఉండలు ఉడికాక మాత్రమే)