చెట్నీ పొడి

అందరికీ నమస్కారం.నా మిగతా బ్లాగుల్ని ఆదరించినట్టే ఈ బ్లాగుని కూడా ఆదరిస్తారని ఆశిస్తూ.... 

మేము మామూలుగా చేసుకునేవే ఇక్కడ రాస్తాను. కాబట్టి ఎవ్వరూ భయపడక్ఖర్లేదోచ్!!

మొట్టమొదటగా చెట్నీ పొడి రాస్తాను.  

చెట్నీ పొడి: 

కావలసిన పదార్థాలు- 

2 కప్పుల సెనగపప్పు 

11/2 కప్పుల మినప్పప్పు 

1/2 కప్పు ధనియాలు  

ఎండుమిరపకాయలు తగినంత

1 కప్పు ఎండు కొబ్బెర

2 చెంచాల జిలకర

చింతపండు తగినంత  

బెల్లము తగినంత  

ఉప్పు తగినంత  

1 గరిటెడు నూనె (మనం వాడేది)  

2 ఇంగువపొడి

చేసే విధానం-  

• ముందుగా పప్పుల్నీ , ధనియాల్నీ బాణలిలో వేయించుకోవాలి.
• తర్వాత కొద్దిగా నూనె వేసి మిరపకాయల్ని వేయించి, ఎండు కొబ్బెరని వేడి చేయాలి.
• తర్వాత గరిటెడు నూనె బాణట్లో వేసి నాలుగు ఆవగింజలు వేసి అవి చిటపట్లాడేక, చింతపండు అందులో వేసి, వెంటనే మెల్లగా గరిటతో తీసి ఇంకో గరిట సహాయంతో నూనె కారిపోయేలా నొక్కెయ్యాలి.  
• ఇప్పుడు పప్పుల్నీ, కొబ్బెర, మిరపకాయల్నీ కలిపి కొంచెం బరకగా పొడి చెసుకోవాలి.
• అందులో నూనె నొక్కెయ్యగా గట్టిపడిన చింతపండునీ, బెల్లాన్నీ, ఉప్పుని వేసి పొడిచేయాలి.
• పొడి మరీ గంధంలా కాకుండా చూసుకోండేం..  
• అప్పుడే అయిపోయిందనుకున్నారో పప్పులో కాలేసినట్లే .హి..హి..హి  
• ఆపొడిని బాణట్లో ఇంగువ వేగిన గోరువెచ్చని గరిటెడు నూనెలొ వేసి బాగా కలిపి ఒక సీసాలో వేసి మూసిపెట్టండి. 
• చెట్నీ పొడి తయార్.

ఈపొడి 15 రోజులైనా తాజా గా ఉంటుంది (నీళ్ళవీ పొయ్యకుంటేనే సుమా.) 

మా ఇంట్లో అయితే 4 రోజుల్లో అవగొట్టేస్తాం. అంతరుచిగా ఉంటుంది. 

కొసమెరుపు: ఇది అన్నంలోకీ, చపాతీకీ , దోసెకీ పూరీకీ ఉప్మాకీ అన్నింటికీ బాగుంటుంది.

ఇంకా సాయంకాలం బొరుగులు(మరమరాలు) చెట్నీపొడి, కొంచెం నెయ్యి కలిపి తింటే చాలా బాగుంటుంది. 

• గమనించండి-- 
• ఉప్పు,చింతపండు,బెల్లం ఎవరి రుచి కి తగినంత వాళ్ళు వేసుకుంటే బాగుంటుందని కొలతలు చెప్పలేదు. 
• ఎండుకొబ్బెర తగ్గించారో రుచి చెడుతుంది.

• మిరపకాయలు మాఊరివైపు బ్యాడిగి మిరపకాయలని దొరుకుతాయి. అవి అయితే10,12వేయొచ్చు, కారముండవు, రుచి,ఎర్రటి రంగు బాగా వస్తుంది. కారంవైతే తక్కువే వేసుకోవాలి. ఎందుకంటే ఇది పులుపు, తీపి కలిపిన వంటకం కదా !